پنبه ي داغ جنون ايچره نهان دير بدنيم×××ديري اولدوقجا لیباسيم بودور ، اولسه م كفنيم

درد اورتاقدیر

هدف قوتسال

هرکیم اولورسان اول

داغ،دره،دومان،یول

من هر گئجه، سنین چون آغلارام

یا سن زنگانداکی یاندیریلان یوزاللی کیشی

یا سن سالماسداکی دوغرانیلان بیر اسگر

یاسن وارلیغین بیراخیب تهرانا گئدیب دووارلار دیبینده پورتاغال ساتان

یا سن نوه سینین دیلین آنلامایان بیر آغساققال بابام

یا سن ماهنی سی دوداغیندا پاسلانمیش آغ بیرچک آبام

هرکیم اولورسان اول

. من هرگئجه سنین چون آغلارام 

############################

منی سسله ییر اوچ کیشی

محمد امین

سونرا بییم

ایزین وئرین سئودیگیم قیزین آدین سویله مه ییم.

#############################

گئدرکن آز ایدی یاشی

آردیجا باخیردی باجی باخیشی

توکه نیردی آنا طاقتی

اوتدو ایللر آیلار

مکتوب یازدی آیلار  

قیزلاری سئویلمیر

اوغلانلار سئومیر

گووده سی جانسیزدیر

داماری قانسیز

خیرتده یی خیریلتیدا

نفسی سایدا

هارداسان هاردا

قارداشیم تئز گل

بو شهری بوغور ایکی ال  

قاییدارکن

 آغارمیشدی قاشی

سورگون شاعیری

قارشیلامادی بیری

باجی نی قویمادی اری

آنا تورپاق امانتی  

دونن گولوردو شهر

تانیش دئییل دی کیمسه یه کدر

آی هوروردو ساچی نی

آیدا بزه ییردی تاجی نی

آیدین سئویردی باجی نی

آغیزلار اوخشاییردی لاچینی

آی آمان

نه چتین میش تورپاق حسرتی

اوجا داغ، سرین سو، یایلاق حسرتی  

بوگون قالماسادا اوشاقلیق اویونداشی

قالیر خاطیره سی

قالیر ائوجیکلرین خینالی داشی

قالیر آغزیمدا دادی

آنا اوجاغی نین ایستی آیران آشی

داش اوزدوره جه ییک گولچه لرینده

ایشیق سالاجاق سولارینا

توز تورپاغی سیلینمیش آینا

آند اولسون اوشاق اوره یینین آیدینلیغینا

آند اولسون.

#######

 اوتاغین ایچینده آددیملاییرام

ایچیرم

و پنجردن کوچه یه باخیرام

هاوا سویوقدور

هره بیر پاپاق تاخمیش باشینا

قاچیر

 دوشورم کوچه له رین جانینا

دولانیرام

بلکه بیری الیمدن توتوب آپارسین ائوه

آپاریرلار

یئرسیزلر ساراینا

یئر سیز دئییلم دئیه

پنجره دن آتیلیب

قاچیرام

دولانیرام کوچه لری

بلکه بیری

الیمدن توتوب آپارسین ائوینه

قوناق تک یاشام ایسته مم دئیه

الیمی الیندن قورتاریب

قاچیرام

یورغون آرغین

ماغمین ماغمین

دولانیرام کوچه لری

بلکه بیری الیمدن توتوب قایتارسین ائویمه

آما هر ندن اونجه

سون قویسون دردیمه کدریمه

ائویم اوتورمالی اولسایدی

من اوتورا بیلسه یدیم

گئجه نین بو واختی

بو سویوق قیشدا

دوشمزدیم کوچه له ره

 دولانیرام کوچه له ری

بلکه بیری...

########

    باشیمدا مین بیر سئودا          

       سینه مده مین بیر یارا                              اوره یمیده مین بیر درد

سئودامین بیری سن

یارامین بیری وطن                                                  دردیمین بیری اوغولسوز ددم

        باشیمین مین سئوداسی        

     سینه مین ،مین یاراسی     

   اوره یمین مین دردی         

لاچین،کلبجر،خان کندی.

###############

قیزیم من سنه

نه ماهنی اویره ده جه یم

نه یاد دیلده سرود

نه ده قوران

گئت هر نه یه اینانیرسان اینان

منیم سنه پاییم

کیچیجیک باغچا

و نئچه گولدان

توخوم اک

سو سپ

هر گون گونش دورمادان اویان

سئرچه سسینه

سارماشیق هوسینه

من سنه نه سالام اویره ده جه یم

نه ساغ اوللاشما

یالنیز

چیچک بئجرمک اویره ده جه یم

چیچک بئجرمک.

نوشته شده توسط nuri در ساعت 13:55 | لینک  |